Viðburðarríkt ár

Óhætt er að segja að árið 2025 hafi verið afar viðburðarríkt og voru miklar sveiflur á flestum eignamörkuðum. Árið einkenndist af aukinni spennu í alþjóðahagkerfinu með breyttri stöðu í kjölfar valdaskipta í Bandaríkjunum í ársbyrjun. Því fylgdu áform um tollahækkanir og samningaviðræður á milli landa þegar leið á árið, að viðbættum stríðsátökum og auknum áherslum á öryggis- og varnarmál margra vestrænna ríkja.

Markaðir sem Almenni-Lífsverk lífeyrissjóður fjárfestir á skiluðu þrátt fyrir það flestir ágætri ávöxtun en þó var lækkun á innlendum hlutabréfamarkaði. Blandaðar ávöxtunarleiðir lífeyrissjóðsins, sem fjárfesta bæði í hlutabréfum og skuldabréfum hækkuðu á bilinu 6,1% til 6,6% og hæst var nafnávöxtunin í Ævisafni III, sem fjárfestir meira í skuldabréfum en hlutabréfum. Sú ávöxtunarleið Almenna sem skilaði hæstri ávöxtun árið 2025 var Skuldabréfasafn, sem er blandað innlent skuldabréfasafn og nam nafnávöxtun safnsins um 8,5% sem jafngildir 4,6% raunávöxtun, en verðbólga ársins var 3,7%.

Séreignarleiðir Lífsverks lífeyrissjóðs skiluðu einnig jákvæðri ávöxtun, nafnávöxtun leiðanna á árinu 2025 var 5,7% í Lífsverki 1, 6,2% í Lífsverki 2 og 8,4% í Lífsverki 3. Í ársbyrjun 2026 sameinuðust ávöxtunarleiðir Lífsverks leiðum í séreignarsjóði Almenna þannig að Lífsverk 1 sameinaðist Ævisafni II, Lífsverk 2 sameinaðist Ævisafni III og Lífsverk 3 sameinaðist Skuldabréfasafni.

Samtryggingarsjóðir Almenna og Lífsverks skiluðu báðir jákvæðri ávöxtun, nafnávöxtun samtryggingarsjóðs Almenna var 6,1% og samtryggingarsjóðs Lífsverks 6,2%. Uppgjörsaðferðir sjóðanna eru aðeins ólíkar en Almenni metur öll skuldabréf á markaðsverði en Lífsverk hluta þeirra á framreiknuðu kaupverði. Sjóðirnir sameinuðust þann 1. janúar 2026.

Heimsvísitala erlendra hlutabréfa, MSCI, hækkaði um 21,1% í Bandaríkjadollar á árinu 2025, en mældist 9,7% í íslenskum krónum vegna veikingar dollarans. Miklar sveiflur voru á erlendum hlutabréfamörkuðum á árinu. Eftir valdaskipti í Bandaríkjunum í lok janúar hófust vangaveltur um fyrirætlanir nýrra stjórnvalda vestanhafs í efnahagsmálum. Áform um víðtækar tollahækkanir á helstu viðskiptalönd Bandaríkjanna voru svo kynnt í byrjun apríl. Þau urðu til þess að hlutabréf á heimsvísu hríðféllu og lækkaði heimsvísitala hlutabréfa MSCI um ríflega 10% fyrstu vikuna í apríl í dollar. Þær lækkanir gengu svo hratt til baka þegar leið á aprílmánuð og þó að árið hafi vissulega liðið í talsverðri óvissu þá má segja að helstu hlutabréfamarkaðir heims hafi sýnt styrkleika og skilað ágætri ávöxtun. Undanfarin ár hefur ávöxtun á erlendum hlutabréfamörkuðum að jafnaði verið nokkuð góð og hefur heimsvísitala erlendra hlutabréfa MSCI hækkað að jafnaði um 12,1% í dollurum síðastliðin fimm ár sem samsvarar um 11,7% árlegri nafnávöxtun í íslenskum krónum.

Síðastliðið ár var krefjandi á innlendum hlutabréfamarkaði og lækkaði heildarvísitala aðallista um 5,9% á árinu. Eftir hækkun í upphafi árs fór markaðurinn að gefa eftir og lækkaði innlendi hlutabréfamarkaðurinn samhliða erlendum mörkuðum, vegna óvissu í kjölfar tollaákvarðana Bandaríkjanna. Þá lækkuðu stór fyrirtæki á markaði verulega, Alvotech lækkaði um 64,4% á árinu og Icelandair um 39,3%. Þau félög sem hækkuðu mest voru Arion banki sem hækkaði um 30,2% og Íslandsbanki um 25,5% . Undanfarin fimm ár hefur heildarvísitala aðallista hækkað um 6% að jafnaði á ári.

Undanfarna mánuði hefur ársverðbólga innanlands sveiflast í kringum 4% og undirliggjandi verðbólga hefur verið þrálát. Seðlabanki Íslands hélt áfram vaxtalækkunarferli sínu á árinu, þó hægar en markaðsaðililar höfðu vonast til og eru stýrivextir í árslok 7,25%. Skuldabréfamarkaðurinn skilaði jákvæðri ávöxtun yfir árið og hækkaði vísitala Nasdaq Iceland fyrir 10 ára löng verðtryggð skuldabréf um 4,9% og vísitala Nasdaq Iceland fyrir 10 ára óverðtryggð skuldabréf hækkaði um 6,7%.

Horfur í upphafi ársins 2026 litast af óvissu, bæði hér heima og erlendis. Eftir kröftug hagvaxtarár hér innanlands hafa undanfarin tvö ár verið krefjandi. Háir vextir, verðbólga, aukin samkeppni í ferðaþjónustu, hækkun tolla, auðlindagjöld og fleiri þættir hafa talsverð áhrif á þjóðarbúið um þessar mundir. Væntingar um lækkun verðbólgu og vaxtastigs á næstu misserum geta þó á móti haft jákvæð langtímaáhrif. Á erlendum mörkuðum hafa fjárfestar í auknum mæli þurft að horfa til milliríkjasamskipta, tolla og minni stöðugleika í hinum vestræna heimi, til viðbótar við efnahagslega mælikvarða á borð við vexti, verðbólgu og afkomu fyrirtækja. Hagkerfi heimsins og helstu markaðir sýndu þó talsverðan viðnámsþrótt þrátt fyrir aukna óvissu og möguleg viðskiptastríð. Nú, sem fyrr, er talið ráðlegt fyrir langtímafjárfesta að halda sjó og ávaxta eignir í blönduðum verðbréfasöfnum sem leggja áherslu á góða eigna- og áhættudreifingu.

Góð eignadreifing
Ávöxtun verðbréfasafna ræðst af eignasamsetningu og ávöxtun einstakra verðbréfaflokka. Almenni-Lífsverk lífeyrissjóður leggur mikla áherslu á góða eignadreifingu til að draga úr heildaráhættu safnanna. Sjóðurinn birtir mánaðarlega upplýsingar um ávöxtunarleiðir þar sem meðal annars má lesa um eignasamsetningu. Smellið hér til að skoða upplýsingablöðin. Sjóðurinn birtir einnig ítarlegar upplýsingar um ávöxtun og sveiflur á heimasíðu, sjá nánar hér.

Upplýsingafundur fyrir sjóðfélaga
Almenni-Lífsverk býður sjóðfélögum á kynningarfund um ávöxtunarleiðir og lífeyrisréttindi í sameinuðum lífeyrissjóði (flutt réttindi og framtíðarréttindi), þriðjudaginn 27. janúar kl. 17:15 á Hilton Reykjavík Nordica. Fundinum verður jafnframt streymt á heimasíðu sjóðsins.